A wani mataki na inganta rayuwar Almajirai da tsaftace muhalli, Kungiyar Darul Nahratul Ahbabul Qur’an ta gudanar da wani shiri na musamman a Tsangayar Gwani Usman Ladani dake Kano. Wannan shirin ya kunshi rabon tallafi da kuma tsaftace Almajirai, wanda aka shirya domin tabbatar da cewa yara Almajirai suna samun kulawa ta musamman da kuma ingantaccen yanayi na karatu.
Wannan tsangaya, wacce take daya daga cikin tsoffin cibiyoyin koyar da Almajirai a yankin, ta kasance cibiyar da Almajirai ke samun ilimin addini da tarbiyya. A wannan karon, Kungiyar Darul Nahratul Ahbabul Qur’an ta bayar da tallafi ga Almajiran, wanda ya kunshi kayan abinci, kayan karatu, da kuma kayan sawa, domin tallafawa rayuwar Almajiran da inganta yanayin karatun su.
Baya ga rabon tallafi, kungiyar ta kuma gudanar da tsaftace-tsaftar muhalli a tsangayar. An samar da kayan tsaftacewa tare da hadin gwiwar Almajiran da malamansu, inda aka yi tsaftace-tsaftar dakuna, bandakuna, da sauran wuraren da Almajiran ke amfani dasu a tsangayar.
Shugaban Kungiyar, Gwani Usman Muktar Muhammad Ladani, ya bayyana cewa wannan shiri yana daya daga cikin manufofin kungiyar na inganta rayuwar Almajirai da kuma tabbatar da cewa suna karatu cikin yanayi mai kyau. Ya kuma yi kira ga sauran kungiyoyi da masu hannu da shuni da su taimaka wajen tallafawa Almajirai da malamansu don inganta ilimi a Najeriya.
A nasa jawabin, daya daga cikin malaman tsangayar, ya nuna godiya ga kungiyar bisa wannan shirin, inda ya bayyana cewa wannan taimako zai taimaka matuka wajen kara kaimi ga Almajirai wajen yin karatu da kuma tsaftace muhalli.
Kungiyar Darul Nahratul Ahbabul Qur’an tana daya daga cikin kungiyoyin da ke kokarin inganta rayuwar Almajirai da tsangayoyi a fadin Najeriya, tare da mayar da hankali wajen samar da yanayi mai kyau na karatu da tarbiyya ga matasa.